Wahyu - Sajak-Sajak Darpan

 

Humanoid, AI Image.

WAHYU

Ceuk péso: hayu urang sosonoan.
Daging ngalieus, mulangkeun panineungan
Kana sél-sél nu diperih pati
Mekarkeun kahirupan

Masih ngarep-ngarep asih nu amis?
Geus teu kaitung lalampahan péso néang laratan
Lunta tina katuna hayang manggih seukeut jawaban

Tepung jeung daging nu hipu
Manggih wahyu nu dikemu waktu

2024





CAU AMBON 

Iraha teuing ngarep-ngarep ngaran
Pan Pangéran geus ngagelarkeun kakawasaan

Mun lumut dipaké ngaran
Cirining Pangéran geus ngamparkeun rusiah
Saha baé bisa leukeun kokoréh

Ngaran lahir tina angin jeung halimun
Halimun nyingray ku angin
Renung rupaning pingaraneun

Di pucuk cau aya nu datang hayang dingaranan
Jantungna tara ambon sorangan

2024





TREUK

Lalakon nu mahiwal geus kacatet dina aspal
Getih garing jeung rébuan inghak
Jadi kerak dina lebu jalan

Ku naon bet nyieun fiksi nu amis
Di satukangeun setir jeung erém nu ngeplos
Aéh, hirup pan anjang-anjangan

Tunggul kuburan teu kudu nyaho
Aya antrian erém nu lalimpeu
nalikreuh muru tanjakan
Paheula-heula muru pudunan

2024





MADU

Salila amis napel na létah
Euweuh catetan nu jujur
Kumaha madu nepi ka botol lalucu

Salila botol némbongkeun konéng madu
Euweuh nu ngadongéngkeun sajarah
Saha nu mahala sayang nu juuh

Salila diuyup unggal rék saré
Madu pageuh nyekel rusiah
Iraha kungsi ngarasa teu tumaninah

Aya nu kagunturan madu
Aya nu kaurugan sadrah

2024

DARPAN, lahir di Karawang taun 1970. Pangarang, nulis dina basa Sunda jeung Indonesia. Sababaraha kali karangan basa Sundana dilélér hadiah sastra LBSS jeung D.K. Ardiwinata. Buku kumpulan carponna, Nu Harayang Dihargaan, dilélér hadiah sastra Rancagé taun 1999. Sapopoéna mancén tugas jadi pengawas di lingkungan Dinas Pendidikan Provinsi Jawa Barat.