![]() |
Black Hole, AI Image. |
INTERSTELLAR
200 héktar, kebon jagong
nu masrahkeun dirina
ka hujan kekebul,
jadi hiji-hijina nyawa.
Buku nu murag tina rak,
kodeu binér tina saabrulan
kekebul, kawas enigma
ti juru alam gaib.
“Cooper, boa buku
jeung kekebul ti alam jin?”
“Lain, Murph. Waktu
lir rumus fisika
nu ngarijutkeun kulit pipi
anjeun mangsa urang tepung
sababaraha poé deui.”
2067 M, Cooper balayar
ka langit jeung gargantua,
maluruh dunya anyar,
kawas Nabi Nuh. Tapi
waktu ngarayap lalaunan.
Ajal ngarambat rerencepan.
Di jero tesseract, manéhna
tepung jeung Murph,
katut diri sorangan
nu liwung di tengah kamar.
“Murph! Nya kami
jin nu saenyana!”
Cooper ngagero bari
nyurungkeun buku.
Tapi Murph teu nyarita.
Manéhna teu percaya,
dirina geus ngarobah
takdir hirup manusa.
2024
KAGURA
Manéhna lain mayungan
hujan atawa girimis
nu diawurkeun
ti kubah langit.
Tapi manéhna percaya,
kubah payung seimei
salawasna mayungan
rembetna pikiran.
“Kaadilan lain seuseukeut
pedang Hayabusa,
tapi hujan nu walatra
nyiraman tutuwuhan.”
Sepi geus jadi beusi.
Cinta nu rembes, jadi karinget
dina daun-daun sakura.
Tapi manéhna teu percaya.
2024
SABOTEUR (AGE OF EMPIRES 2)
Saumur hirup
mamanggul takdir
nu dirusiahkeun
dina gentong jati.
Ajal nu basajan,
lir kembang malati
nu mangkak
dina vas imaji.
Kaambung dumalingding
seungit sawarga.
Karungu aya nu tumanya.
“Saha urang saenyana?”
2024
UP & UP
: Coldplay
Mémang aya warna sépia
nu ngagurat dina kanvas.
Kangungun nu sumulusup
dina urat-urat nu regas.
Tapi upama pikiran sadar,
anjeun luncat tina jandéla,
nyeuseup seungit mawar
nu mekar di buruan cahaya.
Di tepas, urang nungguan
metikan jeruk lima.
Binih kastuba lalaunan
tumuwuh di taman pikiran.
Upama hirup teu muskil,
10 lalaki futsal luhureun spons,
parahu balayar dina mangkok,
lain perkara nu mustahil.
2014
PRAYOGA ADIWISASTRA, lahir di Purwakarta, 18 Januari 1992. Alumni Jurusan Basa Sunda UPI Bandung. Nulis pangpangna dina wangun sajak, carpon, jeung éséy. Dimuat dina majalah Manglé, tabloid Galura, jeung koran Pikiran Rakyat. Ayeuna cekel gawé jadi guru basa Sunda di SMAN 2 Sukatani, Purwakarta.
0 Komentar